أضف سؤال أو موضوع جديد          

سالفتي سالفة مع الكرايسلر إذا فاضي اتفضل .

up 48 down 3
أبو نايف السالمي 221
قبل 7 سنه و 5 شهر



السلام عليكم ورحمة الله وبركاته

حياكم الله يا شباب وأسعد الله أوقاتكم بكل خير

أنا حصلت لي سالفة مع موتري كرايسلر 2006 أمريكي من قبل رمضان وتوها تنتهي

راح أبدأ معكم من الأول لكن أبيك تستحضر معي هذه الآية أثناء القراءة قال تعالى (وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لا تعلمون)

بداية السالفة قبل رمضان بدت السيارة تطفي علي وأشغلها وترجع تشتغل وأحياناً تطول ما تشتغل

المهم وديت السيارة لورشة عندنا في حي الخليج وكشف عليها قال عندك الكمبيوتر والورشة معروفة على طريق الأمير بندر وكل السيارات اللي فيها دوج والمهندس اسمه نستور

المهم ما اقتنعت بكلامه ووديت السيارة للصناعية القديمة داخل الرياض لورشة المطيويع المعروفة للكرايسلر كشفوا على الموتر قالوا أيضاً كمبيوتر لكن قال لي المهندس إذا تبي نصيحتي غير حساس الحذاف وبعدين نشوف إذا ما ضبطت راح نتأكد أنه الكمبيوتر لا محالة

المهم غيرنا حساس الحذاف والمشكلة باقية نفسها قال لي المهندس خلاص لازم تغير لك الكمبيوتر ونبرمجه لك بـ 1100 ريال من غير الكمبيوتر نفسه

سحبت نفسي من عنده لأن برمجته بالوكالة بـ 350 ريال فقط

كلمت الوكالة استفسر عن مواعيدهم قالوا مافيه إلا بعد العيد المهم تساهلت وما حجزت موعد ووقفت السيارة عندي بالبيت والله وأدبر لي سيارة وأعيد عليها أنا وعيالي يوم رجعت بعد العيد حجزت موعد عند الوكالة وكان الموعد في تاريخ 25\8\2014 يعني بعد 4 أيام من الآن

المهم قبل أسبوع دورت مفتاح السيارة إلا وهو ضايع وموقفها من بداية رمضان ودورت في البيت كله ما حصلته وكرهت نفسي وكرهت السيارة

وتذكروا الآية هنا اللي قلت لكم في بداية الموضوع

قلت أودي السيارة للوكالة يطلعون لها مفتاح ويركبون لها كمبيوتر مرة وحدة والله واسأل عن المفتاح عندهم من البرمجة قالوا يكلفك 1350 ريال

والله وأبحث بالإنترنت عن ناس متخصصين بالمفتاح وأحصل واحد يقال له أبو هلال ونعم الرجال قال لي يكلفك المفتاح 700 ريال مع البرمجة وكل شيء

اتفقت معه البارح وجاني وفتح السيارة وبرمج لي مفتاح والله وأروح على السيارة وأمغط فيها بما أنها واقفه ما يقارب شهرين

ألا وتصير المفاجأة أن السيارة ما تطفي ما صدقت نفسي وافرفر فيها أكثر وأكثر وأدعس وأهدي وأطفي وأشغل ألا والسيارة زي الحلاوة

في النهاية اكتشفت أن المفتاح هو كان المشكلة لأن المفتاح القديم اللي ضاع كان الولد الله يصلحه يلعب فيه ومكسره وكنت ملزق عليه عشان يتماسك وأتوقع كان فيه مشكلة بالشريحة حقت المفتاح اللي مبرمجة على السيارة وصارت تطفي

والحمد لله افتكينا من تركيب كمبيوتر يمكن يكلفني بحدود الأربعة الآلف وتذكرت قوله تعالى (وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لا تعلمون)

وصدق الله العظيم العالم بشؤوننا وما يصلح لنا وما يضرنا مع أني لعنت نفسي ولعنت أم الحالة كلها يوم ضاع المفتاح لأن إذا جتك مشكلة وواجهتك مشكلة أخرى أثناء محاولتك لحل المشكلة الأولى راح تكره نفسك

لكن سبحان الله يسر لي تضييع المفتاح عشان ما أتخسر وأتبهذل

والمعذرة على الإطالة ِلكن حبيت أعيشكم بالجو اللي عشته

وبالتوفيق للجميع







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


اخوي انا سيارتي تطفي من حالها ورجع اشغلها وتشتغل عذبتني


up 0 down 0
ابن احصيني
قبل 3 سنه و 11 شهر



انا كانت تطفي في الخط فجأه خاصه اذا مسكت خط
واتصح ان صفايه البانزيم هي المشكله
موقعها خلف الراكب مباشره تحت المرتبه
موديلها ٢٠٠٧